Հունաստանը ողջունել է Թուրքիայի դեմ ամերիկյան պատժամիջոցները

Հունաստանի ԱԳՆ-ը ողջունել է Թուրքիայի դեմ ԱՄՆ-ի կողմից պատժամիջոցների կիրառումը՝ ռուսական Ս-400 զենիթահրթիռային համակարգերի ձեռքբերման համար, հաղորդում է РИА Новости-ն։

«ՆԱՏՕ-ի անդամ երկիր Հունաստանը գոհ է ԱՄՆ ֆինանսների նախարարության կողմից Թուրքիայի պաշտպանական արդյունաբերության քարտուղարության, դրա ղեկավարի և այլ ղեկավարների դեմ պատժամիջոցներ սահմանելու մասին հայտարարությունից՝ «Պատժամիջոցների միջոցով Ամերիկայի հակառակորդներին հակազդելու» մասին օրենքի 231-րդ բաժնի համաձայն»,- ասված է Հունաստանի ԱԳՆ-ի հաղորդագրության մեջ: Աթենքը համարում է, որ Թուրքիայի կողմից Ս-400 հակաօդային պաշտպանության համակարգերի ձեռքբերումը ՆԱՏՕ-ի շահերի դեմ է ուղղված։