«Չգիտեմ՝ լա՞ց լինեմ, թե՞ ծիծաղեմ»․ Լապշին

Հայտնի ռուս բլոգեր Ալեքսանդր Լապշինը Facebook-ի իր էջում գրում է․ «Կորոնավիրուսն, իհարկե, լավ թունավորել է ճանապարհորդների կյանքը. չվերթների անկանխատեսելի չեղարկում, տարբեր երկրների անընդհատ փոփոխվող պահանջներ, արգելափակումներ և կարանտին.
բայց կան նաև զվարճալի պահեր «սև հումորի» շարքից. օրերս մի իսրայելուհի, չգիտես ինչու, հատել է Իսրայելից Սիրիա սահմանը, կարողացել է անցնել ոչ միայն սահմանային ցանկապատի վրայով, այլև շրջանցել 2 պատերազմող պետությունների սահմանին ականադաշտերը։ Եվ Սիրիայում նրան անմիջապես բռնել են սիրիացի սահմանապահները, որից հետո Իսրայելի բոլոր լրատվամիջոցները մի քանի օրով մոռացել են կորոնավիրուսի մասին և գրել միայն հարևան պետությունում մոլորված կնոջը փրկելու անհրաժեշտության մասին։ Արդյունքում Սիրիան նրան վերադարձրել է՝ Ռուսաստանի միջնորդությամբ։ Եվ փառք Աստծո։
Իսկ իմ պատմությունը ճիշտ հակառակն է։ Ոչ միայն իմ, այլ տասնյակ հազարավոր մարդկանց:
Իսրայելում պետությունը փոքր երեխաների համար նպաստ է վճարում, գումարը փոքր է, ամսական մոտ 45 դոլար, նույնիսկ ավելի քիչ, քան օրինակ Ռուսաստանում, եթե չեմ սխալվում: Ճիշտն ասած, ես վաղուց չեմ հետևում այս նպաստին, այն «կաթում է» բանկային հաշվին. 1 տարվա ընթացքում կհավաքվի 500 դոլար՝ կգնամ և կհանեմ բանկոմատից: Մի խոսքով, ես նույնիսկ մոռացել եմ, որ այդ գումարները փոխանցվում են հաշվեհամարին:
Չէի էլ հիշի երեխայի նպաստի մասին, եթե պետությունն ինքն այդ մասին չհիշեցներ։
Նամակ է գալիս, թե երեխայի հետ 3 ամիս առաջ արտասահման մեկնելու պատճառով մենք դադարեցնում ենք նպաստ վճարելը։ Եվ վերջում գրում են, եթե համաձայն չեք որոշման հետ, և արտասահմանում ձեր գտնվելու պատճառը հարգելի է, կամ ձեզանից անկախ՝ գրեք պատասխան նամակ և մենք կուսումնասիրենք այն։
Դե, ես գրում եմ, որ հունվարի 26-ից Իսրայելը փակել է միջազգային օդանավակայանները և բոլոր ցամաքային սահմանային անցակետերը, հետևաբար, դժվար է մուտք գործել երկիր: Ինչին պատասխան գալիս է՝ բառացիորեն եբրայերենից թարգմանած․ «Մենք վերանայել ենք ձեր առարկությունները: Չվերթների բացակայությունն ու սահմանների փակումը հարգելի պատճառներ չեն՝ արտերկրում ձեր գտնվելու համար»։
Չգիտեմ՝ լաց լինե՞մ, թե՞ ծիծաղեմ. կամ ավելի լավ է՝ ճեղքե՞լ Իսրայելի սահմանը, ինչպես այն իսրայելուհին Սիրիայում, միայն հակառակ ուղղությամբ. իհարկե, ոչ թե Սիրիայից, այլ ինչ-որ այլ տեղից»։