Արմեն Գևորգյանը հրավիրվել է ՀՔԾ

Նախկին փոխվարչապետ, «Հայաստան» դաշինքի շտաբի պետ Արմեն Գևորգյանն այսօր հրավիրվել է ՀՔԾ։ Քիչ առաջ լրագրողների հետ զրույցում Գևորգյանը պարզաբանեց, թե ինչու է կանչվել։

«Դեռևս անցած տարի ՀՔԾ-ը քրեական գործ էր հարուցել ինչ-ինչ փաստերի կապակցությամբ, որտեղ ինչ-որ հանգամանքներ են նկարագրվում և ասվում է, որ ես այդ ամենի հետ առնչություն ունեմ, որ, մասնավորապես, իմ բարեկամների մի շարք գույքեր փաստացի պատկանում են ինձ, և ես այդ ամենը լվացել եմ, եթե ճիշտ եմ հասկանում»,- ասաց նա՝ նշելով, որ այն ժամանակ մեղադրանք չի առաջադրվել։

«Կարծում եմ՝ այն ժամանակ քննություն իրականացնելիս հասկացել են, որ դա աբսուրդի ժանրից է, բայց իրանք հաջորդ քայլն են արել և այդ գույքերի վրա կալանք են դրել։ Մենք դիմել ենք դատական ատյաններին։ Բոլոր ատյաններում այս պահի դրությամբ քննիչի համապատասխան որոշումը ճանաչվել է ապօրինի և բեկանվել է»,- ասաց նա։

Գևորգյանի խոսքով՝ ՀՔԾ-ը բացառապես քաղաքական պատվերներ է կատարում։

«ՀՔԾ-ը զբաղվում է մահացած մարդկանց գույքերն ինձ վերագրելով»,- հավելեց Գևորգյանը՝ ընդգծելով, որ մեղադրանքին չի ծանոթացել և չի պատրաստվում ծանոթանալ։