Հոնկոնգում Բասքիայի նկարը վաճառվել է 30 միլիոն դոլարով

Ամերիկացի նեոէքսպրեսիոնիստ և գրաֆիտիի հեղինակ Ժան-Միշել Բասքիայի նկարը Հոնկոնգում վաճառվել է 30 միլիոն դոլարով: Այս մասին հայտնել են Christie's-ում կայացած աճուրդի կազմակերպիչները:
«Լոտը վաճառվել է 234 290 000 հոնկոնգյան դոլարով (30,1 միլիոն դոլար) և դարձել ամենաթանկն աճուրդում»,- նշել են կազմակերպիչները: Նրանք պարզաբանել են, որ այդ ստեղծագործությունը գնահատվել էր 18-22 միլիոն դոլար: Գնորդի անունը չի հրապարակվում:
Խոսքը 1982 թվականի նկարի մասին է։ Նկարն անվերնագիր է։ Այն ստեղծվել է 182.9x121.9 սմ չափերի կտավի վրա՝ ակրիլային, յուղային և աէրոզոլային ներկերով ու կոլաժի տարրով:
Այս աշխատանքը վերջին անգամ Լոնդոնում աճուրդի էր հանվել 2017 թվականին՝ 14.5 միլիոն դոլարով: 1987 թվականին (հեղինակի կենդանության օրոք) այն վաճառվել էր 23.1 հազար դոլարով: