Իտալիայի օդանավակայանում դինոզավրի ձու է հայտնաբերվել

Իտալիայի Բերգամո քաղաքի օդանավակայանում մաքսային ծառայությունը դինոզավրի ձու է հայտնաբերել այն ծանրոցների մեջ, որոնք նախատեսված են Իտալիա ներկրելու համար, հաղորդում է Giornale di Brescia տեղական հրատարակությունը:
Դինոզավրի քարացած ձվի կճեպը եկել է Մալայզիայից՝ որպես գնում ինտերնետ-խանութից: Ծանրոցը Իտալիա է ստացվել կասկածելի փաստաթղթերի ուղեկցությամբ. հավաստագիրն, ինչպես նշում է հրատարակությունը, տրվել է գոյություն չունեցող գերատեսչության կողմից:
Գիտնականները գտածոն որակել են որպես շունոզավրի ձու՝ խոշոր բուսակեր դինոզավրի, որն ապրել է ժամանակակից Չինաստանի տարածքում:
Giornale di Brescia-ի հաղորդագրության համաձայն՝ ծանրոցը ստացողը հրաժարվել է դրանից։ Պատշաճ սերտիֆիկացման բացակայության արդյունքում հնագիտական արժեքն անցել է Իտալիայի տրամադրության տակ և կներկայացվի թանգարաններից մեկի ցուցադրությանը: