Շաբաթ, 22 հունվարի, 2022 թ.
|
Ստեփանակերտում`   +5 °C

Ալիևը կրկին խոսել է «Զանգեզուրի միջանցքի» կարևորության մասին

Ալիևը կրկին խոսել է «Զանգեզուրի միջանցքի» կարևորության մասին
491
Ուրբաթ, 12 նոյեմբերի, 2021 թ., 19:12

Ադրբեջանի նախագահ Իլհամ Ալիևը Ստամբուլում տեղի ունեցած Թյուրքալեզու պետությունների համագործակցության խորհրդի 8-րդ գագաթնաժողովում կրկին խոսել է Զանգեզուրի միջանցքի մասին՝ տարածքային պահանջներ ներկայացնելով Հայաստանին։

«Վաղ թե ուշ Հայաստանը կհասկանա, որ տարածքային պահանջները ոչ մի երկրին օգուտ և պատիվ չեն բերում։ Հուսով եմ՝ Հայաստանը կհրաժարվի Թուրքիայի և Ադրբեջանի դեմ տարածքային հավակնություններից, հակառակ դեպքում ավելի կվատացնի իր դրությունը»,- հայտարարել է նա։

Ադրբեջանական լրատվամիջոցների փոխանցմամբ՝ Ալիևն ասել է, որ Ադրբեջանն ամեն ինչ անում է թյուրքական աշխարհի հզորացման համար։

Ալիևի խոսքով, իբր 1920-ականներին խորհրդային ղեկավարության որոշմամբ «Ադրբեջանը փաստացի մասնատվել է, և ադրբեջանական տարածքի մի մասը փոխանցվել է Հայաստանին»։

«Այսպիսով, թյուրքական աշխարհը մասնատվեց, և այսօր մենք կրկին միավորում ենք թյուրքական աշխարհի աշխարհագրությունը լոգիստիկ նախագծերի միջոցով»,- ասել է Ալիևը։

Նա նաև հայտարարել է, որ տարածաշրջանային մակարդակով ղարաբաղյան պատերազմում Ադրբեջանի հաղթանակը նշանակում է կապի և նյութատեխնիկական ապահովման զարգացում, և այդ տեսանկյունից կարևորել է «Զանգեզուրի միջանցքի» բացումը։

«Սա «(Զանգեզուրի միջանցքի» կիրարկումը) շատ լայն հնարավորություններ կբացի ողջ տարածաշրջանի համար։ Այդ միջանցքը լավ պոտենցիալ ունի, այն կապելու է թյուրքական աշխարհի բոլոր երկրներին, մեզ կապելու է Եվրոպայի հետ։ Այն շատ կարևոր նախագիծ է»,- հավելել է նա։