2-ամյա Տիգրանը հրել է 1250 կգ-անոց մեքենան ու գրանցվել «Դյուցազնագրքում»

7453

Երեքշաբթի, 04 հունվարի, 2022 թ., 15:42

Գյումրեցի 2-ամյա Տիգրան Սարգսյանը նոր ռեկորդ է սահմանել ու գրանցվել «Դյուցազնագրքում»։ Ինչպես հայտնում է «Սպուտնիկ Արմենիա»-ն, փոքրիկը կարողացել է 25 մետր հրել հայրիկի Opel Astra-ն, որի կշիռը 1250 կիլոգրամ է։
Տղայի տատիկի՝ Մարինա Սարգսյանի խոսքով՝ ավելի վաղ Տիգրանին հաջողվել էր նույն մեքենան հրել 15 մետր։
«Տիգրանը գերազանցեց իր ռեկորդը՝ հրելով 25 մետր։ Նա տանը մարզվում է, ութ կիլոգրամանոց ծանրաձող է վերցնում (երեխայի սեփական քաշը 10 կգ է) ու ման գալիս»,- ասում է տատիկը։

Տիգրանն իր ընտանիքի առաջին դյուցազունը չէ. նրա ավագ եղբայրը՝ 8-ամյա Դավիթը, ռեկորդակիր է դարձել 4 տարեկանում։ Նա նույնպես մեքենա է հրել ու գրանցվել «Դյուցազնագրքում»։