Վահագն Խաչատրյանը՝ նախագահի պաշտոնում իր թեկնածության մասին

ԲՏԱ նախարար Վահագն Խաչատրյանը լրագրողների հետ զրույցում արձագանքել է իշխող ուժի կողմից իրեն նախագահի թեկնածու առաջադրելու մասին հրապարակումներին: «Քանի որ դեռևս չկա ՀՀ ԱԺ նախագահի որոշում, որով դադարեցվում է գործող նախագահի լիազորությունները, գեղեցիկ չի լինի այսօր որևէ մեկնաբանություն անելը: Միգուցե մարդը հետ է վերցնում դիմումը»,- ասել է նա՝ հավելելով, որ տեսականորեն կարող էր իր անունը շրջանառվել. «Չափանիշները՝ 40 տարեկանից բարձր, ՀՀ քաղաքացի, ճանապարհ անցած մարդ, նախարար... կարելի է ենթադրել, որ կարող եմ առաջադրվել»:

Ավելի վաղ հայտնի էր դարձել, որ իշխող «Քաղաքացիական պայմանագիր» կուսակցության վարչության նիստի ընթացքում քննարկվել է ՀՀ բարձր տեխնոլոգիական արդյունաբերության նախարար Վահագն Խաչատրյանին ՀՀ նախագահի թեկնածու առաջադրելու հարցը։