«Անդրադառնամ երեկվա խայտառակ հաշվով խաղին». Լևոն Պաչաջյան

Հայաստանի ազգային հավաքականի նախկին կիսապաշտպան, Եվրոպայում ՀՖՖ դեսպան Լևոն Պաչաջյանը ֆեյսբուքյան իր էջում գրել է. «Մի երկու բառով անդրադառնամ երեկվա խայտառակ հաշվով խաղին և բոլորիդ բարի օր մաղթելով լավ օր ցանկանամ…
Ճիշտ է, կատակով անդրադարձա երեկվա կատարյալ ձախողմանը, որը չունի արդարացում, բայց ունենք այն, ինչ ունենք…
Այսպիսի ձախողումները իրոք պետք է բացառվեն: Չի կարող ոչ մի տրամաբանության մեջ տեղավորվել, թե ոնց կարելի է հաղթել բավականին մարտունակ Չեռնոգորիային և ընդամենը 4 օր անց 9-0 «գլխի վրա» գահավիժել Նորվեգիայում: Ինչ էլ ուզում է լինել (կարմիր քարտ և այլն) այսպիսի հաշիվը անընդունելի է, անընդունելի:
Մարզիչներն ու ֆուտբոլիստները ներողություն են հայցել այս խայտառակության համար, բայց կարծում եմ՝ քիչ է, պետք է շատ հեռուն գնացող վերլուծություն և հետևություն անել:
ՀՖՖ-ն մարզիչների և ֆուտբոլիստների «կապրիզները» իր ուսերի վրա տանելով, կարծում եմ ոմանց համար անփոխարինելիների և անպատժելիության մթնոլորտ է ստեղծել: Էդ մասով պետք է վերանայել մոտեցումները: Կտրուկ քայլեր են պետք այսպիսի պարտություններից զերծ պահելու համար Հավաքականին, ու մեղավորներին պետք է պատախանատվության կանչել վերջապես:
Պարտվել էլ կա, պարտվել էլ…»: