Եղիշե Թադևոսյանի «Կոմիտաս» կտավը «վերադարձել» է Ազգային պատկերասրահ

Եղիշե Թադևոսյանի «Կոմիտաս» բարձրարժեք կտավը, որը 2015 թվականից ցուցադրվում էր Կոմիտասի թանգարան-ինստիտուտում, այսօր «վերադարձել» է Ազգային պատկերասրահ և որպես առանցքային ստեղծագործություն ներկայացված է «Հայկական իմպրեսիոնիզմ» ցուցահանդեսում։
Հայ նկարիչների ստեղծագործություններում Կոմիտասի կերպարն առաջին անգամ հանդիպում է Եղիշե Թադևոսյանի արվեստում: 1890-ական թվականներին նկարիչն ու Կոմիտաս Վարդապետը դասավանդում էին Էջմիածնի Գևորգյան ճեմարանում և անչափ մտերիմ էին: 1903-ին Բյուրականում Թադևոսյանը վրձնել է «Երաժշտագետ Կոմիտասը» էտյուդը, որը հիմք է դարձել հետագայում արված էսքիզների և 1935 թվականի ավարտուն տարբերակի համար: Կոմիտասն այստեղ պատկերված է ճերմակ սքեմով՝ ծառին հենված, ժողովրդական երգերը գրի առնելիս: