Հայտնի են ֆուտբոլի աշխարհի առաջնության՝ եզրափակիչ դուրս եկած հավաքականները

Ֆուտբոլի աշխարհի չեմպիոն Ֆրանսիայի հավաքականն աշխարհի առաջնության կիսաեզրափակիչում մրցեց Մարոկկոյի թիմի հետ և առավելության հասավ 2:0 հաշվով՝ դուրս գալով եզրափակիչ։

Դիդիե Դեշամի գլխավորած թիմը խաղի հաշիվը բացեց արդեն 5-րդ րոպեին։ Գոլի հեղինակ դարձավ Իտալիայի չեմպիոն «Միլանի» 25-ամյա պաշտպան Տեո Էրնանդեսը:

79-րդ րոպեին Ֆրանսիայի հավաքականի երկրորդ գոլը խփեց Ֆրանկֆուրտի «Այնտրախտի» 24-ամյա հարձակվող Ռանդալ Կոլո Մուանին, որը մի քանի վայրկյան էր դուրս եկել փոխարինման։

Հանդիպմանը տրիբունայից հետևում էր նաև Ֆրանսիայի նախագահ Էմանուել Մակրոնը։

Եզրափակիչում Ֆրանսիայի հավաքականը դեկտեմբերի 18-ին կմրցի Ամերիկայի գավաթակիր Արգենտինայի հետ, որը կիսաեզրափակիչում 3:0 հաշվով պարտության է մատնել 2018թ․ աշխարհի փոխչեմպիոն Խորվաթիային։

Դեկտեմբերի 17-ին Խորվաթիան ու Մարոկկոն կվիճարկեն բրոնզե մեդալները։