Հաագան հրաժարվել է հետաքննել «Հյուսիսային հոսք»-ում տեղի ունեցած պայթյունները

«Հյուսիսային հոսք»-ում տեղի ունեցած պայթյունները չեն հետաքննվի Հաագայում Ուկրաինայի դեմ ագրեսիայի հանցագործությունների հետապնդման միջազգային կենտրոնի շրջանակներում, հաղորդում են ռուսական լրատվամիջոցները՝ վկայակոչելով Եվրոհանձնաժողովի ներկայացուցիչ Քրիստիան Վիգանդին:

Նա բացասական պատասխան է տվել այն հարցին, թե արդյոք Միջազգային կենտրոնը նախատեսում է հետաքննել ռուսական գազատարների վրա տեղի ունեցած ահաբեկչությունները։ Ըստ Վիգանդի, այս հաստատությունը կքննարկի միայն ռազմական հանցագործությունները, որոնք կատարվել են բարձրաստիճան քաղաքական և ռազմական առաջնորդների կողմից:

«Ագրեսիայի հանցագործությունները վերաբերում են երկրի բարձրագույն քաղաքական և ռազմական առաջնորդների կողմից իրականացված ռազմական հանցագործություններին... Ինչպես մենք բազմիցս ասել ենք, խողովակաշարերի հետ կապված հետաքննությունը պետք է իրականացվի ազգային իշխանությունների կողմից», - ասել է Վիգանդը: