Ուկրաինան «ռաշիզմը» ճանաչել է՝ որպես Ռուսաստանի պետական գաղափարախոսություն

837

Երեքշաբթի, 02 մայիսի, 2023 թ., 18:36

Ուկրաինայի Գերագույն Ռադան պաշտոնապես ճանաչեց «ռաշիզմը»՝ որպես Ռուսաստանի պետական գաղափարախոսություն։ Այս բանաձևին կողմ է քվեարկել 281 ժողովրդական պատգամավոր, հայտնում են ուկրաինական լրատվամիջոցները։

Բանաձևի նախագծում թվարկված են «ռաշիզմին բնորոշ նշաններ»՝ «իշխանության և միլիտարիզմի պաշտամունքը, առաջնորդի անձի պաշտամունքը և պետական ինստիտուտների սրբադասումը, Ռուսաստանի և ռուսների ինքնամեծարումը այլ ժողովուրդների գոյության բռնի ճնշման և (կամ) ժխտման միջոցով»։

Գերագույն Ռադան նախատեսում է դիմել Գլխավոր դատախազություն, արդարադատության նախարարություն և Ուկրաինայի այլ գերատեսչություններ՝ «անհապաղ» միջոցներ ձեռնարկելու՝ «Ուկրաինայի տարածքում ռաշիզմի գաղափարախոսության և քաղաքականության դրսևորումներին արձագանքելու համար»։

Նաև Ուկրաինայի խորհրդարանը մտադիր է դիմել միջազգային հանրությանը Ռուսաստանում քաղաքական ռեժիմը «ռաշիզմ» հայտարարելու առաջարկով։