Պակիստանում ձերբակալվել է նախկին վարչապետ Իմրան Խանը

Պակիստանի նախկին վարչապետ Իմրան Խանը ձերբակալվել է Իսլամաբադում։ Տեղական լրատվամիջոցները հայտնում են, որ նա ձերբակալվել է Al-Qadeer Trust-ի միջոցների յուրացման վերաբերյալ դատական ​​նիստի շրջանակներում:

Խանին բերման ենթարկելուց հետո նրա կողմնակիցների և ոստիկանների միջև ծեծկռտուք է սկսվել։ Մի քանի մարդ վիրավորվել է։ Նրանց թվում են Խանի փաստաբանները, համակիր պակիստանցիները և մի քանի ոստիկաններ։

Խանը պաշտոնանկ է արվել 2022 թվականի ապրիլի 10-ին՝ խորհրդարանի կողմից նրան անվստահություն հայտնելուց հետո։ Ներկայում նրա դեմ տասնյակ քրեական գործեր են հարուցվել Պակիստանի դատարաններում՝ տարբեր մեղադրանքներով, այդ թվում՝ ահաբեկչություն և անկարգություններ:
Ինքը՝ Խանը, պնդում է, որ իշխանությունից իր հեռացումն անօրինական է և քարոզարշավ է իրականացրել իր իրավահաջորդի՝ վարչապետ Շահբազ Շարիֆի կառավարության դեմ՝ պահանջելով արտահերթ ընտրություններ։