Բողոքի ցույց Թբիլիսիում՝ ընդդեմ Ռուսաստանի հետ ավիահաղորդակցության վերականգնման

689

Չորեքշաբթի, 10 մայիսի, 2023 թ., 22:06

Մայիսի 10-ի երեկոյան Թբիլիսիում Վրաստանի ԱԳՆ շենքի մոտ տեղի է ունենում ցույց՝ ընդդեմ Ռուսաստանի հետ ուղիղ չվերթների վերականգնման։
Ըստ ականատեսների, այս պահին շենքի մոտ հավաքվել են մի քանի տասնյակ մարդիկ, ովքեր պաստառներ են պարզել և կարգախոսներ են վանկարկում, սուլոցներ են հնչեցնում ու թմբուկ ծեծում։ Ի թիվս այլնի, հնչում են անպարկեշտ բացականչություններ՝ ուղղված ՌԴ իշխանություններին:

Չորեքշաբթի ավելի վաղ ՌԴ նախագահ Վլադիմիր Պուտինը հրամանագիր է ստորագրել ռուսական ավիաընկերությունների համար դեպի Վրաստան ուղիղ չվերթների արգելքը վերացնելու մասին, ինչպես նաև մայիսի 15-ից Վրաստանի քաղաքացիների համար առանց վիզայի ռեժիմ մտցնելու մասին։ Վրաստանի նախագահ Սալոմե Զուրաբիշվիլին այս որոշումը սադրանք է անվանել և կոչ է արել Ազգային անվտանգության խորհուրդ գումարել՝ ռուսների համար վիզային ռեժիմ մտցնելու համար։ Նրա կարծիքով, Ռուսաստանի Դաշնության քաղաքացիներին պետք է վիզաներ տրամադրվեն մինչև երեք ամիս ժամկետով։