Վրաստանի նախագահը ՌԴ-ի կողմից վիզային ռեժիմի չեղարկումը սադրանք է որակել

Վրաստանի նախագահ Սալոմե Զուրաբիշվիլին Վլադիմիր Պուտինի կողմից Վրաստանի հետ վիզային ռեժիմի և ուղիղ ավիահաղորդակցության արգելքի չեղարկումը որակում է՝ որպես Ռուսաստանի հերթական սադրանք։

«Հերթական ռուսական սադրանքը: Ուղիղ թռիչքների վերականգնումն ու Վրաստանի հետ վիզային ռեժիմի չեղարկումն անընդունելի են, քանի դեռ Ռուսաստանը շարունակում է իր ագրեսիան Ուկրաինայի դեմ և օկուպացրած պահում մեր տարածքը»,- Twitter-յան իր միկրոբլոգում գրել է Զուրաբիշվիլին։

Ավելի վաղ հայտնել էինք, որ Պուտինի որոշմամբ Ռուսաստանը մայիսի 15-ից չեղարկում է Վրաստանի քաղաքացիների համար վիզային ռեժիմը՝ վերացնելով նաև ուղիղ չվերթների արգելքը։

Պաշտոնական Թբիլիսին դեռևս որևէ մեկնաբանություն չի արել։

Հիշեցնենք, որ Ռուսաստանը Վրաստանի հետ ուղիղ ավիաչվերթների արգելքը սահմանել է 2019 թվականի ամռանը՝ «Գավրիլովի գիշերից» հետո։

Ռուսաստանը Վրաստանի քաղաքացիների համար վիզային ռեժիմ է մտցրել 23 տարի առաջ՝ 2000 թվականին: Հատկանշական է, որ Վրաստանն իր հերթին ՌԴ քաղաքացիների համար վիզային ռեժիմը վերացրել է 2012 թվականին։