«ՆԱՏՕ-ն պետք է հստակ որոշում կայացնի Ուկրաինայի հարցով». Լեհաստանի նախագահ

Լեհաստանի նախագահ Անջեյ Դուդան հայտարարել է, որ Վիլնյուսում՝ ՆԱՏՕ-ի գագաթնաժողովի ժամանակ, պետք է հստակ որոշում կայացվի Հյուսիսատլանտյան դաշինքին Ուկրաինայի անդամակցության վերաբերյալ։ «Հուսով եմ՝ գագաթնաժողովը լավ լուր կբերի Կիևին, որ ՆԱՏՕ-ին Ուկրաինայի անդամակցությունը հորիզոնում է, որ թունելի վերջում լույս կա»,- ընդգծել է Դուդան։

Հիշեցնենք՝ օրեր առաջ ՆԱՏՕ-ի գլխավոր քարտուղարի տեղակալ Միրչա Ջոանեն հայտարարել էր, որ ՆԱՏՕ-ի անդամ երկրները փոխհամաձայնության չեն հասել Ուկրաինայի անդամակցության հարցում: Վերջինի խոսքով՝ Ուկրաինայում Ռուսաստանի հատուկ գործողությունը շարունակվում է, ուստի երկրի՝ ՆԱՏՕ մտնելու հարցը «պետք է հետաձգվի»։