«Ազովի»՝ Ուկրաինա վերադարձած հրամանատարները մտադիր են կրկին մասնակցել ռազմական գործողություններին

Հուլիսի 8-ին Ուկրաինա վերադարձած՝ «Ազովստալի» պաշտպանների հրամանատարները պատրաստվում են կրկին մասնակցել մարտական ​​գործողություններին։ Այս մասին Լվովում լրագրողների հետ հանդիպմանը հայտարարել է Ազովի գնդի հրամանատար Դենիս Պրոկոպենկոն: Այստեղ զինվորականները ժամանել են Թուրքիայից Ուկրաինայի նախագահ Վլադիմիր Զելենսկու հետ միասին։

«Խորապես համոզված եմ, որ բանակը թիմային աշխատանք է, և այսօրվանից մենք միասին կշարունակենք պայքարը, մեր խոսքն անպայման կասենք մարտում, ամենակարևորն այն է, որ ուկրաինական բանակը գրավել է ռազմավարական նախաձեռնությունն առաջնագծում և մենք ամեն օր առաջ ենք շարժվում»,- ասել է Պրոկոպենկոն։

«Մենք վերադարձել ենք և կշարունակենք կատարել մեր աշխատանքը»,- իր հերթին ասել է Ազովի հրամանատարի տեղակալ Սվյատոսլավ Պալամարը։

Հուլիսի 8-ին հայտնի է դարձել Մարիուպոլում «Ազովստալի» պաշտպանության հրամանատարների՝ հայրենիք վերադարձի մասին։ 5 ուկրաինացի զինծառայողներ նույն ինքնաթիռով ժամանել են Ուկրաինայի նախագահ Վլադիմիր Զելենսկու հետ Ստամբուլից։