ԱՄՆ-ն օգնություն կտրամադրի Թայվանին՝ որպես ինքնիշխան պետության

ԱՄՆ նախագահ Ջո Բայդենի վարչակազմը հավանություն է տվել 80 միլիոն դոլարի հատկացմանը Թայվանին՝ Արտաքին ռազմական ֆինանսավորման (FMF) ծրագրի միջոցով զենք ձեռք բերելու համար։ Այս ծրագիրը սովորաբար կիրառվում է ինքնիշխան պետությունների նկատմամբ, հայտնում է Reuters-ը։
FMF-ի միջոցով ԱՄՆ-ն Թայվանին կտրամադրի ամերիկյան ռազմական տեխնիկա և կպատրաստի զինվորական անձնակազմ: Միաժամանակ Պետդեպարտամենտի ներկայացուցիչը հայտնել է, որ օգնության տրամադրումը «չի արտացոլում կղզու կարգավիճակի հետ կապված քաղաքականության փոփոխությունները»։

Այդ միջոցները կօգտագործվեն Թայվանի պաշտպանունակության ամրապնդման և ծովային անվտանգության ապահովման համար։ Ավելի վաղ Ջո Բայդենը հայտարարել էր Թայվանին մինչև 345 միլիոն դոլարի ռազմական օգնություն տրամադրելու մտադրության մասին։

Չինաստանը խստորեն դատապարտել է զենքի փոխանցումը։

Չինաստանը Թայվանը համարում է իր նահանգներից մեկը և իր տարածքի անբաժանելի մասը։ Հունիսին Չինաստան կատարած այցի ժամանակ ԱՄՆ պետքարտուղար Էնթոնի Բլինքենն ընդգծել է, որ ԱՄՆ-ն չի աջակցում Թայվանի անկախությանը և չի ձգտում նոր սառը պատերազմ հրահրել։