Իսրայելը մեղադրում է Իրանին նավի կալանման համար

Իսրայելի իշխանությունները դատապարտում են Եմենի հութիների կողմից Galaxy Leader բեռնատար նավի կալանումը և հարձակման մեջ մեղադրում Իրանին։ Այս մասին ասված է Իսրայելի վարչապետ Բենիամին Նեթանյահուի գրասենյակի տարածած հաղորդագրության մեջ։
«Մենք խստորեն դատապարտում ենք Իրանի հարձակումը միջազգային նավի վրա: Նավը, որը պատկանում է բրիտանական ընկերությանը և շահագործվում է ճապոնական ընկերության կողմից, Իրանի քմահաճույքով զավթվել է Եմենում հութի զինյալների կողմից»,- ասվում է տեքստում:

Նեթանյահուի գրասենյակի տվյալներով՝ նավի վրա «անձնակազմի՝ տարբեր ազգությունների 25 անդամ կա, այդ թվում՝ ուկրաինացիներ, բուլղարացիներ, ֆիլիպինցիներ և մեքսիկացիներ»։ «Նավում իսրայելցիներ չեն եղել»,- ընդգծվում է հայտարարության մեջ։

«Սա իրանական ահաբեկչության ևս մեկ գործողություն է, որը քայլ առաջ է ազատ աշխարհի քաղաքացիների դեմ Իրանի ագրեսիայի շղթայում և միջազգային հետևանքներ է ստեղծում գլոբալ նավագնացության ուղիների անվտանգության վրա»,- ավելացրել է գրասենյակը: