Շոլցը բացառել է գերմանական զինվորականների և ՆԱՏՕ-ի զորքերի ուղարկումն Ուկրաինա

Գերմանիայի կանցլեր Օլաֆ Շոլցը Դրեզդենում քաղաքացիների հետ երկխոսության ժամանակ բացառել է գերմանական զինվորականների և ՆԱՏՕ-ի զորքերի ուղարկումն Ուկրաինա, փոխանցում է ՏԱՍՍ-ը։

Իր ելույթում նա ևս մեկ անգամ ընդգծել է, որ Գերմանիայի կառավարությունն ամեն ինչ կանի, որպեսզի կանխի պատերազմի սրումը և պատերազմը Ռուսաստանի ու ՆԱՏՕ-ի միջև։

«Ուկրաինական հողում չեն լինի ոչ գերմանացի զինվորականներ, ոչ էլ ՆԱՏՕ-ի զինվորներ»,- հավելել է կանցլերը՝ ասելով, որ ինքը հավատարիմ է մնում այս տեսակետին:

Ավելի վաղ Ֆրանսիայի նախագահ Էմանուել Մակրոնը հաստատել է իր վիճահարույց հայտարարությունն Ուկրաինա արևմտյան զորքեր ուղարկելու մասին։ Դաշնակիցները հրաժարվել են պաշտպանել քաղաքական գործչի նման պատճառաբանությունը։ Ավելին, Կիևին աջակցելու մասին վեճերը, ըստ լրատվամիջոցների, արդեն իսկ հանգեցրել են բացահայտ թշնամանքի Փարիզի և Բեռլինի միջև։ Կրակի վրա յուղ են լցնում Ուկրաինայի և Լեհաստանի միջև առկա խնդիրները, ինչպես նաև Հունգարիայից և Սլովակիայից հնչող՝ բանակցելու կոչերը ռազմական մատակարարումների փոխարեն, գրում է «Գազետա»-ն: