Փարիզում Էլմիրա Կարապետյանին 1 միավոր չբավականացրեց եզրափակիչ անցնելու համար

Փարիզի օլիմպիական խաղերում Հայաստանը ներկայացնող հրաձիգ Էլմիրա Կարապետյանին ընդամենը 1 միավոր չբավականացրեց եզրափակիչ անցնելու համար:
Հրաձիգը 10 մետր օդամղիչ ատրճանակ մրցաձևի կանանց որակավորման փուլում 60 կրակոցով վաստակեց 576 միավոր՝ զբաղեցնելով 9-րդ տեղը:
Եզրափակիչ դուրս եկան լավագույն 8 արդյունք ցույց տված հրաձիգները: Նշենք, որ 6-8-րդ տեղերը գրաված մարզուհիները վաստակեցին 577-ական միավոր:
Հիշեցնենք՝ 33-րդ ամառային օլիմպիական խաղերի բացման հանդիսավոր արարողությունը տեղի ունեցավ հուլիսի 26-ին Ֆրանսիայի մայրաքաղաք Փարիզում։ Խաղերի բացումն առաջին անգամ անցկացվում էր ոչ թե մարզադաշտում, այլ Սեն գետում՝ նավակների վրա։ 206 երկրների մարզիկներ նավերի շքերթով իրենց երկրների դրոշները ծածանեցին Փարիզում։ Հայաստանի դրոշակակիրը բռնցքամարտիկ Դավիթ Չալոյանն էր։
Հայաստանը օլիմպիական խաղերում 15 ներկայացուցիչ ունի (7 մարզաձևում)՝ հրաձիգ Էլմիրա Կարապետյանը, մարմնամարզիկներ Արթուր Դավթյանն ու Վահագն Դավթյանը, հունահռոմեական ոճի ըմբիշներ Արթուր Ալեքսանյանը, Մալխաս Ամոյանը, Սլավիկ Գալստյանը, ազատ ոճի ըմբիշներ Արսեն Հարությունյանն ու Վազգեն Թևանյանը, ծանրորդներ Անդրանիկ Կարապետյանը, Գարիկ Կարապետյանը և Վարազդատ Լալայանը, բռնցքամարտիկ Դավիթ Չալոյանը, լողորդներ Վարսենիկ Մանուչարյանն ու Արթուր Բարսեղյանը, վազորդ Երվանդ Մկրտչյանը: