Telegram-ի թիմը առաջին հայտարարությունն է տարածել Պավել Դուրովի ձերբակալությունից հետո

Telegram-ի թիմը հրապարակել է առաջին պաշտոնական հայտարարությունը պլատֆորմի հիմնադիր Պավել Դուրովի՝ Փարիզում ձերբակալության վերաբերյալ։

«Telegram-ը համապատասխանում է ԵՄ օրենքներին, ներառյալ թվային ծառայությունների մասին օրենքը. դրա մոդերատորությունը համապատասխանում է ոլորտի չափանիշներին և մշտապես բարելավվում է:

Telegram-ի գործադիր տնօրեն Պավել Դուրովը թաքցնելու ոչինչ չունի և հաճախ է շրջում Եվրոպայով մեկ։ Անհեթեթ է պնդել, որ հարթակը կամ դրա սեփականատերը պատասխանատու է այդ հարթակում չարաշահումների համար։

Գրեթե միլիարդ օգտատերեր ամբողջ աշխարհում օգտագործում են Telegram-ը՝ որպես հաղորդակցության միջոց և կարևոր տեղեկատվության աղբյուր։

Մենք սպասում ենք այս իրավիճակի շուտափույթ լուծմանը։ Telegram-ը մնում է բոլորիդ հետ»,- ասվում է ընկերության Telegram ալիքում հրապարակված հայտարարության մեջ։

Հիշեցնենք, որ 39-ամյա միլիարդատեր Պավել Դուրովը, ով Ֆրանսիայի քաղաքացիություն ունի, ձերբակալվել է օգոստոսի 24-ի երեկոյան Փարիզի օդանավակայանում։ Նա կասկածվում է ահաբեկչության, խարդախության, թմրամիջոցների ապօրինի շրջանառության և մանկական պոռնոգրաֆիայի հետ կապված հանցագործությունների մեջ, քանի որ Telegram հարթակը հրաժարվել է համագործակցել իրավապահ մարմինների հետ։ Այս մեղադրանքներով Պավել Դուրովին կարող է սպառնալ մինչև 20 տարվա ազատազրկում։