Հինգշաբթի, 16 հոկտեմբերի, 2025 թ.
|
Ստեփանակերտում`   +11 °C

Քաշել 3 վագոն` սուր դանակը կոկորդին, պահել 2,2 տոննա` բահի վրա կանգնած մարդը` կոկորդին. հայ դյուցազնի նոր ռեկորդները

Քաշել 3 վագոն` սուր դանակը կոկորդին, պահել 2,2 տոննա` բահի վրա կանգնած մարդը` կոկորդին. հայ դյուցազնի նոր ռեկորդները
932
Երեքշաբթի, 22 հոկտեմբերի, 2024 թ., 23:12

Օրեր առաջ՝ հոկտեմբերի 19-ին, հայազգի դյուցազն Դավիթ Ոսկանյանը սահմանել է իր կարիերայի 6-րդ և 7-րդ ռեկորդները։ «Սկզբից չէր ստացվում, քանի որ միանգամից 4 վագոն էի փորձում՝ 132 տոննա, այն էլ՝ ՍՈՒՐ ԴԱՆԱԿԸ կոկորդիս, որը չստացվեց։ Հյուրերի մի մասը գնաց՝ առանց տեղեկացնելու։ Որը ուղղակի շնորհքի բացակայություն է։ Մտածեցին՝ չեմ կարող։ Հեռացան։ Բայց ուժերս հավաքեցի և 3 վագոն՝ 98 տոննա, տեղաշարժեցի 3.74 մետր, որը ռեկորդ է»,- ՄԱՄՈՒԼ.ամ-ի թղթակցի հետ զրույցում պատմել է Դավիթ Ոսկանյանը:

Դավիթ Ոսկանյանի 6-րդ ռեկորդը` 98 տոննայի քարշակում` սուր դանակը վզին

Սակայն ռեկորդակիրն այսքանով չի բավարարվել: Նույն օրն էլ սահմանում է իր հաջորդ՝ 7-րդ ռեկորդը: Գետնին պառկած՝ մետաղյա վահանի տակ, նա իր մարմնով 15 վայրկյան պահել է 2,2 տոննա կշռով ավտոմեքենա: Կարծես դա էլ բավական չէ, հնարքն իրականացնելու ժամանակ նրա կոկորդին բահ է պահում ու բահի վրա կանգնում նրա՝ 60 կգ-անոց օգնականը:

«Շնորհակալություն նրանց, ովքեր մնացին ու մինչև վերջ հավատացին»,- իր երախտագիտությունն է հայտնում դյուցազնը:

Դավիթ Ոսկանյանը Վանաձորից է: Նա կրկեսի արտիստ է էքստրեմալ և յոգա ժանրերում, նկարիչ, ինժեներ-կոնստրուկտոր և գիտաշխատող զինագործության բնագավառում, ինժեներ դեղագործական գործարանում, «Դյուցազնագրքում» արդեն յոթակի ռեկորդակիր: Այժմ նա նաև մասնագիտանում է աստղաֆիզիկայի ոլորտում: