«Կիևն ինքը պետք է որոշի ՌԴ-ի հետ խաղաղության համար զիջումների հարցը». Ջեյք Սալիվան

Ուկրաինան պետք է ինքնուրույն որոշի հրաժարվել տարածքներից՝ հակամարտությունը լուծելու համար։ Նման կարծիք է հայտնել ԱՄՆ-ի նախագահի ազգային անվտանգության հարցերով օգնական Ջեյք Սալիվանը ABC հեռուստաալիքի եթերում։ «Ես կարծում եմ, որ Ուկրաինան ինքն է որոշում իր ճակատագիրը, և նրա ճակատագիրը չի կարող պարտադրվել դրսից, այդ թվում՝ ԱՄՆ-ի կողմից: Զելենսկին պետք է խոսի, պետք է դա անի, քանի որ մենք խոսում ենք նրա երկրի մասին»,- ասել է Սալիվանը:

Սալիվանի խոսքով՝ Կիևը հասկանում է, որ, ի վերջո, հակամարտությունը կլուծվի բանակցությունների միջոցով։ «2024 թվականի ընթացքում մենք ակտիվորեն շփվել ենք Զելենսկու և նրա թիմի հետ, քննարկել, թե կոնկրետ ինչպիսին կարող են լինել այդ բանակցությունները»,- հավելել է ԱՄՆ-ի առաջնորդի օգնականը։

Նոյեմբերի 29-ին Sky News-ին տված հարցազրույցում Վլադիմիր Զելենսկին հավանական է համարել, որ հակամարտության «թեժ փուլը» դադարեցվի, եթե Կիևի կողմից վերահսկվող տարածքները վերցվեն ՆԱՏՕ-ի «հովանոցի տակ»։ Սա Զելենսկու առաջին հայտարարությունն է 2022 թվականի փետրվարից ի վեր այն մասին, որ նա պատրաստ է դադարեցնել հակամարտությունը՝ առանց կորցրած տարածքները վերադարձնելու։