Օրբանը մերժել է երկարաձգել ՌԴ-ի դեմ պատժամիջոցները մինչև Թրամփի երդմնակալությունը

Հունգարիայի վարչապետ Վիկտոր Օրբանը ԵՄ առաջնորդներին ասել է, որ մտադիր է սպասել մինչև ԱՄՆ նորընտիր նախագահ Դոնալդ Թրամփի երդմնակալությունը՝ նախքան Ռուսաստանի դեմ ԵՄ պատժամիջոցները երկարաձգելու որոշումը: Այս մասին հայտնում է Bloomberg-ը՝ հղում անելով իրազեկ աղբյուրներին։
ԵՄ-ն ներկայացրել է Ռուսաստանի դեմ պատժամիջոցների 15 փաթեթ, որոնք պետք է երկարաձգվեն վեց ամիսը մեկ։ Հաջորդ նման ընթացակարգը նախատեսվում է հունվարի 31-ին՝ Թրամփի երդմնակալությունից 11 օր հետո։
Երկարաձգման համար անհրաժեշտ է 27 մասնակից-երկրների միաձայն աջակցությունը, ինչը Օրբանին հնարավորություն է տալիս վետո դնել, գրում է թերթը։
Հինգշաբթի կայացած ԵՄ մեկօրյա գագաթնաժողովի ավարտին Օրբանն իր գործընկերներին ասել էր, որ պատրաստ չէ երկարաձգել պատժամիջոցները, նշում են աղբյուրները:
Հիշեցնենք, որ նախկինում Օրբանն ընդգծել էր, որ Եվրամիությունը պետք է վերանայի Ռուսաստանի դեմ պատժամիջոցները, որոնք խաթարում են Եվրոպայի մրցունակությունն ու խթանում էներգակիրների գների աճը։