Վրաստանում ցուցարարներն, ի նշան բողոքի, միասնության շղթա են կազմում

Ուղիղ մեկ ամիս անց այն բանից հետո, երբ Վրաստանի վարչապետ Իրակլի Կոբախիձեն հայտարարեց մինչև 2028թ. եվրոինտեգրման դադարեցման մասին, երկրի բոլոր խոշոր քաղաքներում ձևավորվել է «Միասնության շղթա»։

Ամենաերկարը Թբիլիսիում է. շղթան միացնում է աջ ու ձախ գետափերը և մայրաքաղաքի յոթ կամուրջները՝ Մետեխի, Խաղաղության կամուրջ, Բարաթաշվիլի, Սաարբրյուկեն, Գալակտիոն Տաբիձե, Թամար թագուհի և Վախուշտի Բագրատիոնի։ Ավտոմոբիլային երթևեկությունը մասամբ կաթվածահար է:

Ակցիային միացել են, մասնավորապես, երկրի բոլոր հիմնական ընդդիմադիր կուսակցությունները, ուսանողներ, հասարակական կազմակերպություններ, գործարարներ, մշակութային ոլորտի ներկայացուցիչներ, Վրաստանի նախագահ Սալոմե Զուրաբիշվիլին, Թբիլիսի ժամանած՝ Եվրոխորհրդարանի պատգամավորները՝ Միխալ Վավրիկևիչը (Լեհաստան) և Դաինյուս Ժալիմասը (Լիտվա)։
«Միասնության շղթային» մասնակցում են նաև վրացի էմիգրանտները։ Հավաքները կազմակերպվում են Եվրոպայի և ԱՄՆ-ի 40 քաղաքներում։

Բողոքի նախօրեին Միացյալ Նահանգները հայտարարել է «Վրացական երազանքի» հիմնադիր և պատվավոր նախագահ Բիձինա Իվանիշվիլիի դեմ ֆինանսական պատժամիջոցներ կիրառելու որոշման մասին։ Նրան մեղադրում են «Վրաստանի ժողովրդավարական և եվրատլանտյան ապագան խաթարելու մեջ՝ Ռուսաստանի Դաշնությանը հաճոյանալու համար»։
Վաղը՝ դեկտեմբերի 29-ին, իշխող «Վրացական երազանք» կուսակցությունը նախատեսում է անցկացնել նոր նախագահ Միխեիլ Կավելաշվիլիի երդմնակալության արարողությունը։ Ներկայիս նախագահը, ընդդիմությունը և երկրի որոշ միջազգային գործընկերներ չեն ճանաչում նոր խորհրդարանի և նախագահի լեգիտիմությունը։ Հանրապետական ​​կոնգրեսական Ջո Ուիլսոնը հայտարարել է, որ Զուրաբիշվիլին երկրի միակ լեգիտիմ առաջնորդն է և նրան հրավիրել է Դոնալդ Թրամփի երդմնակալությանը 2025 թվականի հունվարի 20-ին։