Ադրբեջանը կփոխի ռուսաստանցիների` երկրում մնալու կանոնները

Ադրբեջանը շուտով կփոխի երկրում ռուսաստանցիների գտնվելու կանոնները. այս մասին հայտարարել է երկրի արտգործնախարարության մամուլի քարտուղար Այհան Հաջիզադեն։

Նա նշել է, որ ադրբեջանական կողմը ժամանակավոր կեցության և միգրացիայի հարցերում «կբխի հավասարության և փոխադարձության սկզբունքներից»։ Հաջիզադեն հավելել է, որ փոփոխություններ կկատարվեն առաջիկա օրերին։

Ադրբեջանի ԱԳՆ-ն հայտարարել է, որ որոշումը կայացվել է Ռուսաստանում օտարերկրացիների գտնվելու կանոնների փոփոխության պատճառով։

Ռուսաստանի արտաքին գործերի նախարարությունը դեկտեմբերի 26-ին հայտարարել է Ռուսաստանում օտարերկրացիների գտնվելու կանոնների փոփոխության մասին։ Հունվարի 1-ից առանց վիզայի Ռուսաստան ժամանած օտարերկրացիները տարվա ընթացքում կկարողանան Ռուսաստանում մնալ ընդհանուր առմամբ մինչև 90 օր։ Մինչ այդ նման օտարերկրացիները կարող էին երկրում լինել ընդհանուր առմամբ 90 օր՝ 6 ամսվա ընթացքում: