Ռուսական զորքերը 2024-ին ավելի քան 420 հազար զինվոր են կորցրել

Ռուսական զորքերը 2024 թվականին Ուկրաինայի տարածքում և Կուրսկի շրջանում ավելի քան 420 հազար զինվոր են կորցրել։ Սակայն նրանք գրավել են ընդամենը 4168 քառակուսի կիլոմետր տարածք, որը հիմնականում բաղկացած է դաշտերից ու փոքր բնակավայրերից։
Պատերազմի ուսումնասիրման ինստիտուտի տվյալներով՝ 2024 թվականին ռուսական ուժերը գրավված տարածքի յուրաքանչյուր քառակուսի կիլոմետրի դիմաց կորցրել են միջինը 102 զինվոր։ Ռուսական ամենամեծ առաջխաղացումը տեղի է ունեցել 2024 թվականի սեպտեմբեր-նոյեմբեր ամիսներին, երբ Ռուսաստանը ապահովեց իր տարածքային նվաճումների 56,5%-ը՝ դրա համար զոհելով մոտավորապես 125800 զինվոր:

«Ռուսական ռազմական հրամանատարությունը, հավանաբար, 2024 թվականի սեպտեմբերից մինչև նոյեմբեր ռեկորդային կորուստներ է կրել՝ փորձելով հնարավորինս շատ տարածք գրավել: Այնուամենայնիվ, պարզ չէ, թե արդյոք ռուսական ռազմական հրամանատարությունը կշարունակի հանդուրժել նման կորուստները, եթե ռուսական առաջխաղացման տեմպերը դանդաղեն»,- գրում է ISW-ն:

2024 թվականի դեկտեմբերին ռուսական առաջխաղացումը դանդաղել է: Աշխարհագրական տվյալները ցույց են տալիս, որ ռուսական զորքերը գրավել են ընդամենը 593 քառակուսի կիլոմետր, ինչը կազմում է օրական 18,1 քառ.կմ: Միաժամանակ ռուսական զորքերի ամենօրյա կորուստները պահպանվել են բարձր մակարդակի վրա՝ օրական միջինը 1585 մարդ, ինչը դարձավ Ռուսաստանի համար պատմական չորրորդ առավելագույնը։

ՌԴ Անվտանգության խորհրդի փոխնախագահ Դմիտրի Մեդվեդևը հայտնել է, որ 2024 թվականին 440 հազար նորակոչիկներ պայմանագրեր են կնքել զինծառայության համար։ Սա վկայում է զգալի կորուստների փոխհատուցման փորձերի մասին։