Նեթանյահուի գրասենյակը հաստատել է ՀԱՄԱՍ-ի հետ համաձայնագրի ստորագրումը

Իսրայելի վարչապետի աշխատակազմը պաշտոնապես հաստատել է, որ Դոհայի բանակցություններում պատվիրակությունները հրադադարի մասին համաձայնագիր են ստորագրել, սակայն Իսրայելի կառավարությունը կքննարկի և կհաստատի այն մինչև շաբաթ օրը։ Այս մասին հայտնում է իսրայելական մամուլը՝ հղում անելով վարչապետ Նեթանյահուի գրասենյակին։

Այն, որ գործարքը համաձայնեցվել է, հայտնի դարձավ դեռ չորեքշաբթի երեկոյան։ Բանակցություններում հիմնական միջնորդները՝ Քաթարն ու ԱՄՆ-ն, հայտարարեցին դա որպես կատարված փաստ։
Սակայն իսրայելական կողմը, չնայած Վաշինգթոնի ճնշումներին, դեռևս չէր հաստատել փաստաթղթի ստորագրումը։ Վերլուծաբանները կարծում են, որ Իսրայելն այդպիսով ազդարարում է, որ միջազգային միջնորդների ոգևորությունը վաղաժամ էր։