Երեքշաբթի, 22 սեպտեմբերի, 2026 թ.
|
Ստեփանակերտում`   +24 °C

Իսրայելն ազատ է արձակել 90 պաղեստինցի բանտարկյալների

Իսրայելն ազատ է արձակել 90 պաղեստինցի բանտարկյալների
830
Երկուշաբթի, 20 հունվարի, 2025 թ., 10:01

Իսրայելն ազատ է արձակել 90 պաղեստինցի բանտարկյալներից բաղկացած առաջին խմբին՝ ՀԱՄԱՍ-ի հետ համաձայնագրի շրջանակներում, գրում է Times of Israel-ը՝ հղում կատարելով Իսրայելի բանտերի ծառայությանը։

Ազատ արձակվածների ցուցակում կա 69 կին և մեկ անչափահաս։ Բացի այդ, բանտից ազատ են արձակվել 12 տղամարդ և մինչև 18 տարեկան ութ երիտասարդ։ Այս անձինք նախկինում դատապարտվել էին Իսրայելի անվտանգության դեմ ուղղված հանցագործությունների համար:

ՀԱՄԱՍ-Իսրայել գործարքի երկրորդ փուլի շուրջ բանակցությունները կսկսվեն փետրվարի սկզբին, Al Jazeera-ին հայտնել է Քաթարի արտաքին գործերի նախարարության պաշտոնական ներկայացուցիչը։

Հիշեցնենք, որ Իսրայելը և պաղեստինյան ՀԱՄԱՍ շարժումը համաձայնության էին եկել Գազայի հատվածում հրադադարի և պատանդների ազատ արձակման շուրջ։

Իսրայելը հայտնել էր, որ հրադադարն ուժի մեջ չի մտնի, քանի դեռ ՀԱՄԱՍ-ը չի տրամադրել պատանդների ցուցակը։

Ավելի ուշ Նեթանյահուի գրասենյակի խորհրդական Դմիտրի Գենդելմանը տեղեկացրել էր, որ ստացել են պատանդների ցուցակը, որոնց ՀԱՄԱՍ շարժումը պետք է ազատ արձակի գործարքի առաջին փուլում։