««Սահակյանց» անիմացիոն ստուդիային զրկում են տարածքից». Դավիթ Սահակյանց

Ռեժիսոր, մուլտիպլիկատոր Դավիթ Սահակյանցին պատկանող «Սահակյանց» անիմացիոն ստուդիան, որը գործում է Երևանի Վարդանանց փողոցի 30 հասցեում, զրկվում է պետության կողմից անհատույց տրամադրված տարածքից․ ահազանգում է անձամբ Սահակյանցը։

«Հարգելի հետևորդներ, ՀՀ կառավարության որոշման համաձայն, «Սահակյանց» ստուդիային զրկում են տարածքից, որը տրամադրվել էր անհատույց 2014 թ-ին կնքված պայմանագրով և դեռ երկար տարիներ պետք է ծառայեր երեխաներին և ուսանողներին կրթելու, բազմաթիվ երեխաներին հյուրընկալելու՝ հայկական անիմացիային ծանոթացնելու և նոր անիմացիոն ֆիլմեր ու նախագծեր ստեղծելու նպատակին։ Ոմանք կարծում են, որ դա այնքան էլ կարևոր ԳՈՐԾ չէ․․․
Ինչևէ․․․
Ցանկանում ենք հայտնել ձեզ, որ կապված իրավիճակի հետ դասընթացների նոր ուսումնական տարվա ընդունելությունը կտեղափոխվի անհայտ ժամանակահատվածով․․․Հետևեք էջին տեղեկացված լինելու համար։
Այն, ինչ մեզ չի սպանում, դարձնում է ավելի ուժեղ․․․»,– գրել է Սահակյանցը։

Հիշեցնենք, որ Դավիթ Սահակյանցը միացել էր Կիրանցի պայքարին, իսկ ավելի վաղ՝ 2021 թվականի խորհրդարանական ընտրությունների ժամանակ առաջադրվել էր «Հայաստան» դաշինքի պատգամավորական ցուցակով։ Նա ցուցակի 44-րդ համարն էր։