Սերբիայում հակակառավարական ցույցերը շարունակվում են

Սերբիայում բողոքի զանգվածային ցույցերը նոր թափ են ստանում։ Ցուցարարները փակել են Բելգրադի գլխավոր մայրուղու հանգույցը։

Ցույցերը սկսվել էին նոյեմբերին, երբ Նովի-Սադե երկաթուղային կայարանի ծածկը փլուզվել էր, ինչի հետևանքով 15 մարդ էր զոհվել: Ի սկզբանե ցուցարարները պահանջում էին միջադեպի թափանցիկ հետաքննություն անցկացնել և պատժել պատասխանատուներին։

Բողոքի ակցիաները վերածվեցին հակակառավարական լայնածավալ ցույցերի՝ պահանջելով նախագահ Ալեքսանդր Վուչիչի հրաժարականը։ Reuters-ի տվյալներով՝ ցույցերին տասնյակ հազարավոր մարդիկ են մասնակցում։

Վուչիչը հայտնել էր, որ Սերբիան դրսից հարձակման է ենթարկվում։ Նրա խոսքով՝ բողոքի ակցիաները ֆինանսավորվում են Արևմուտքի կողմից։ Այդուհանդերձ, իր վերջին ուղերձում նախագահը համաձայնել էր 50 տոկոսով փոխել կառավարության կազմը։