«Սիրիան պատրաստ է ՌԴ-ին թույլ տալ պահպանել իր ռազմաբազաները, եթե դա բխում է երկրի շահերից»․ Սիրիայի ՊՆ

Սիրիան պատրաստ է Ռուսաստանին թույլ տալ պահպանել իր ռազմածովային և օդային բազաները՝ պայմանով, որ Կրեմլի հետ ցանկացած պայմանավորվածություն կհամապատասխանի երկրի շահերին։ Այս մասին հայտարարել է Սիրիայի պաշտպանության նախարար Մուրհաֆ Աբու Քասրան, գրում է The Washington Post-ը։

Աբու Քասրայի խոսքով՝ Ռուսաստանի վերաբերմունքը Սիրիայի նոր կառավարության նկատմամբ «էականորեն բարելավվել է»՝ 2024 թվականի դեկտեմբերին նախագահ Բաշար ալ Ասադի տապալումից հետո, և Դամասկոսն այժմ ծանրութեթև է անում Մոսկվայի պահանջները։

Հարցին, թե Ռուսաստանին կթույլատրվի՞ պահպանել Տարտուսում ռազմածովային բազան և Լաթաքիայում գտնվող Խմեյմիմ ավիաբազան, պաշտպանության նախարարը պատասխանել է՝ «Եթե դա ձեռնտու է Սիրիային, ապա՝ այո»:

«Քաղաքականության մեջ հավերժ թշնամիներ չկան», - ռուսների մասին լրագրողների հարցին պատասխանել են գերատեսչությունից։

Աբու Քասրայի խոսքով՝ Դամասկոսի կառավարությունը բանակցություններ է վարում նաև Սիրիայում ԱՄՆ-ի և Թուրքիայի ռազմաբազաների կարգավիճակի շուրջ։