«Ոչ ոք չի կարող ստիպել Ուկրաինային հանձնվել»․ Սիբիգա

Ուկրաինայի ԱԳ նախարար Անդրեյ Սիբիգան X-ի իր էջում նշել է, որ «ոչ ոք չի կարող ստիպել Ուկրաինային հանձնվել» , և հանրապետությունը կպաշտպանի իր գոյության իրավունքը։ Արտգործնախարարի էջում գրառումը հայտնվել է 8 րոպե անց՝ այն բանից հետո, երբ Թրամփն իր «Truth Social» էջում Զելենսկուն քննադատող ուղերձ է հրապարակել։

«Ուկրաինան ենթարկվել է Եվրոպայի ժամանակակից պատմության մեջ ամենասարսափելի ռազմական հարձակմանն ու երեք տարվա համընդհանուր պատերազմին: Ուկրաինայի ժողովուրդը և նրա նախագահ Վլադիմիր Զելենսկին հրաժարվել են տեղի տալ Պուտինի ճնշումներին։ Ոչ ոք չի կարող ստիպել Ուկրաինային հանձնվել։ Մենք կպաշտպանենք մեր գոյության իրավունքը»,- գրել է Սիբիգան։

Հիշեցնենք, որ Թրամփը Զելենսկուն անվանել է «առանց ընտրությունների բռնապետ», ով կարող է կորցնել իր երկիրը, եթե Ուկրաինայում ընտրություններ չանցկացվեն։