«Բռնապետ՝ առանց ընտրությունների» և «համեստ հաջողություն ունեցող ծաղրածու»․ Թրամփը՝ Զելենսկու մասին

Փետրվարի 19-ին ԱՄՆ նախագահ Դոնալդ Թրամփը Truth սոցցանցում հրապարակել էր գրառում, որտեղ իր ուկրաինացի գործընկեր Վլադիմիր Զելենսկուն անվանել է «բռնապետ՝ առանց ընտրությունների» և «համեստ հաջողություն ունեցող ծաղրածու»։

Իր կոշտ հրապարակման մեջ ԱՄՆ նախագահը կրկին նշել է, որ Զելենսկուն հաջողվել է ԱՄՆ-ից 350 միլիարդ դոլարի ռազմական օգնություն ստանալ, որը Միացյալ Նահանգները երբեք «հետ չի ստանա»։

Թրամփի խոսքով՝ իր վարչակազմը պատերազմի ավարտի հարցում հաջողությամբ բանակցում է Ռուսաստանի հետ, ինչը չէր արել Ջո Բայդենը։ Թրամփի խոսքով՝ Եվրոպան ապացուցել է, որ ի վիճակի չէ խաղաղություն հաստատել, և ինքը՝ Զելենսկին, իր կարծիքով, պատերազմը համարում է «շահութաբեր գործարք» ու ցանկանում է այն շարունակել։ Թրամփը Զելենսկուն խորհուրդ է տվել «արագ գործել, հակառակ դեպքում նա կկորցնի երկիրը»։

Նրա խոսքով՝ Ուկրաինայի նախագահը «հրաժարվում է ընտրություններից» և «ուկրաինացիների շրջանում կորցրել է վստահությունը»։

Ավելի վաղ Զելենսկին մամուլի ասուլիսի ժամանակ հակադարձել էր Թրամփին, նշելով, որ վերջինս, ցավոք, ապատեղեկացված է, և իրական հարցումների արդյունքներն այլ բան են ասում։