«Այսօր մենք Կիևում ենք, քանի որ Ուկրաինան Եվրոպա է»․ Ֆոն դեր Լայեն

Եվրոհանձնաժողովի և Եվրոպական խորհրդի նախագահներ Ուրսուլա ֆոն դեր Լայենը և Անտոնիո Կոշտան ժամանել են Կիև, հայտնում են ուկրաինական լրատվամիջոցները։

Նրանց դիմավորել են Ուկրաինայի նախագահի գրասենյակի ղեկավար Անդրեյ Երմակը և Ուկրաինայի արտգործնախարար Անդրեյ Սիբիգան։

«Այսօր մենք Կիևում ենք, քանի որ Ուկրաինան Եվրոպա է։ Գոյատևման այս պայքարում վտանգված է ոչ միայն Ուկրաինայի, այլև Եվրոպայի ճակատագիրը»,- գրել է ֆոն դեր Լայենը՝ X-ի իր էջում։

Քաղաքական գործիչների այցը համընկնում է Ուկրաինայում պատերազմի երրորդ տարելիցի հետ։ Ինչպես ավելի վաղ հայտնել էր Ուկրաինայի նախագահ Վլադիմիր Զելենսկին, այսօր Կիևում հրավիրված է գագաթնաժողով։ Ակնկալվում է, որ հանդիպմանը կմասնակցեն 13 երկրների առաջնորդներ, ևս 24 քաղաքական գործիչներ կմասնակցեն առցանց: