«Ուկրաինան կստեղծի իր «սեփական ՆԱՏՕ»-ն, եթե Կիևին չընդունեն դաշինքում»․ Զելենսկի

Ուկրաինան կստեղծի իր «սեփական ՆԱՏՕ»-ն, եթե Կիևը չընդունվի Հյուսիսատլանտյան դաշինքում։ Այս մասին հայտարարել է Ուկրաինայի նախագահ Վլադիմիր Զելենսկին՝ հավելելով, որ Ուկրաինայի անդամակցությունը ՆԱՏՕ-ին «ամենապարզ ու տրամաբանական լուծումն է»։

«Եթե Ուկրաինան չմիանա ՆԱՏՕ-ին, մենք ստիպված կլինենք ստեղծել ՆԱՏՕ Ուկրաինայում»,- ասել է նա։

Զելենսկին հստակեցրել է, որ խոսքը հզոր բանակ պահելու, դրա բավարար ֆինանսավորման, զինամթերքի ակտիվ արտադրության և «Ռուսաստանին զսպելու հարցում մեր գործընկերների մասնակցության շուրջ բանակցությունների» մասին է։

Զելենսկին ավելի վաղ հայտարարել էր, որ Կիևին անհրաժեշտ են անվտանգության երաշխիքներ դաշնակիցներից՝ Իսրայելի օրինակով, ինչպես նաև մեծ բանակ և անդամակցություն Եվրամիությանը։