Թրամփը հայտարարել է Ռուսաստանի հետ խոշոր տնտեսական նախագծերի զարգացման մասին

ԱՄՆ-ի նախագահ Դոնալդ Թրամփը հայտարարել է, որ քննարկում է Ռուսաստանի հետ համատեղ տնտեսական խոշոր նախագծեր։

«Ես լուրջ բանակցություններ եմ վարում Ռուսաստանի նախագահ Վլադիմիր Պուտինի հետ պատերազմի ավարտի, ինչպես նաև խոշոր տնտեսական գործարքների շուրջ, որոնք տեղի կունենան Միացյալ Նահանգների և Ռուսաստանի միջև։ Բանակցությունները շատ լավ են ընթանում»,- գրել է Թրամփն իր Truth Social սոցիալական ցանցում։

Թրամփն իր գրառումը գրել է Ֆրանսիայի նախագահ Էմանուել Մակրոնի հետ հանդիպումից և G7-ի անդամների հետ Ուկրաինայում հակամարտության բռնկման վերաբերյալ զանգից հետո։ «Բոլորը ցանկություն հայտնեցին դադարեցնել պատերազմը, և ես ընդգծեցի Միացյալ Նահանգների և Ուկրաինայի միջև «Կրիտիկական օգտակար հանածոների և հազվագյուտ երկրային տարրերի մասին» համաձայնագրի կարևորությունը, որը, հուսով ենք, շուտով կստորագրվի»,- ասել է ամերիկացի առաջնորդը։

Թրամփն ընդգծել է, որ համաձայնագիրը, որն, ըստ էության, լինելու է «Տնտեսական գործընկերություն», կապահովի Վաշինգթոնի կողմից Ուկրաինային աջակցելու համար ներդրված միջոցների վերադարձը, ինչպես նաև կօգնի երկրի տնտեսության զարգացմանը հակամարտության ավարտից հետո։

Փետրվարի 12-ին ՌԴ նախագահ Վլադիմիր Պուտինը երկարատև հեռախոսազրույց է ունեցել Թրամփի հետ, իսկ փետրվարի 18-ին Ռիադում կայացել են բանակցություններ ռուս-ամերիկյան պատվիրակությունների միջև, որից հետո կողմերը պայմանավորվել են անհապաղ սկսել ԱՄՆ-ի և Ռուսաստանի նախագահների հանդիպման նախապատրաստությունը։ Փետրվարի 19-ին Թրամփը հայտարարել էր, որ իր վարչակազմը համաձայնության է եկել Ուկրաինայի հետ հազվագյուտ հողային օգտակար հանածոների վերաբերյալ, սակայն Կիևը «խզել է այն երկու օր առաջ»: