Ռադան երկրորդ փորձից ընդունեց Զելենսկուն աջակցող բանաձև

Ուկրաինայի Գերագույն Ռադան Ուկրաինայում ժողովրդավարությանն աջակցելու մասին բանաձև է ընդունել, որը հաստատում է Վլադիմիր Զելենսկու լիազորությունները՝ մինչև ռազմական դրության ավարտը։

Փաստաթղթում ասվում է, որ Ուկրաինայում պատերազմն անհնարին է դարձնում ազատ, թափանցիկ և ժողովրդավարական ընտրությունների կազմակերպումը, և որ դրա համար անձնական պատասխանատվություն է կրում Ռուսաստանի նախագահ Վլադիմիր Պուտինը։ «Համապարփակ, արդար և կայուն խաղաղության ապահովման դեպքում կհայտարարվեն Ուկրաինայի նախագահի ընտրություններ», ասվում է փաստաթղթում։
Նշվում է նաև, որ Ուկրաինայի Սահմանադրության 108-րդ հոդվածի 1-ին մասի համաձայն՝ Զելենսկին պահպանում է իր լիազորությունները՝ մինչև նոր նախագահի պաշտոնավարումը։

Նախագծին կողմ է քվեարկել 268 պատգամավոր։

Նախօրեին Գերագույն Ռադանյում «Ռուսաստանի ագրեսիայի պայմաններում Ուկրաինայում ժողովրդավարությանն աջակցելու մասին» բանաձևի քվեարկությունը ձախողվել էր։

Քվեարկությանը ներկա էր 272 պատգամավոր, որից 54-ը չի քվեարկել։ Բանաձեւին աջակցել է 218 պատգամավոր։

Բանաձևը հաստատելու համար անհրաժեշտ էր առնվազն 226 ձայն։