«Ուկրաինան պետք է մոռանա ՆԱՏՕ-ի մասին»․ Թրամփ

ԱՄՆ նախագահ Դոնալդ Թրամփը հայտարարել է, որ ԱՄՆ-ն Ուկրաինային անվտանգության լրացուցիչ երաշխիքներ չի առաջարկի։

«Ես չեմ պատրաստվում անվտանգության հավելյալ երաշխիքներ տալ: Մենք դա կթողնենք Եվրոպային... Բայց, անշուշտ, կհետևենք, որ ամեն ինչ լավ ընթանա»,- ասել է նա՝ կառավարության նիստում: Վաշինգթոնը կարող է աջակցել Եվրոպային՝ Ուկրաինայում եվրոպացի խաղաղապահների տեղակայման հարցում։

Սպիտակ տան ղեկավարը վստահություն է հայտնել, որ կկարողանա վերջ տալ Ուկրաինայում պատերազմին։

«Մենք կանենք ամեն ինչ, որպեսզի հասնենք համաձայնության, որը կբավարարի երկու կողմերին»,- ասել է Թրամփը։ Նրա խոսքով՝ ԱՄՆ-ն կփորձի օգնել Ուկրաինային վերադարձնել կորցրած տարածքները, թեև դա դժվար կլինի, սակայն Ուկրաինան պետք է մոռանա ՆԱՏՕ-ի մասին։ «Պատերազմը սկսվել է հենց Հյուսիսատլանտյան դաշինքին Ուկրաինայի անդամակցության խնդրի պատճառով»,- նշել է Թրամփը։