«Կիևը ներողություն չի խնդրի Զելենսկու պահվածքի համար»․ Պոդոլյակ

Կիևը ներողություն չի խնդրի Սպիտակ տանը Վլադիմիր Զելենսկու պահվածքի համար։ Այս մասին Le Point-ին տված հարցազրույցում ասել է Զելենսկու գրասենյակի ղեկավարի խորհրդական Միխայիլ Պոդոլյակը։

Նրա խոսքով՝ Զելենսկին իր արտահայտություններում «բացարձակապես ճիշտ էր՝ ձևով և բովանդակությամբ»։

Ըստ Պոդոլյակի՝ Զելենսկին փորձել է ԱՄՆ-ին փոխանցել այն «առանցքային գաղափարը», որ «առանց Ռուսաստանի վրա ճնշում գործադրելու ոչինչ չի ստացվի»։

«Ուստի մենք ներողություն չենք խնդրի ենթադրյալ սխալի համար, որը տեղի չի ունեցել», - ասել է Պոդոլյակը։

Հիշեցնենք, որ նախորդ շաբաթ Զելենսկին մեկնել էր ԱՄՆ՝ հանքային ռեսուրսների վերաբերյալ պայմանագիր ստորագրելու։ Օվալաձև աշխատասենյակում պաշտոնական հանդիպման ժամանակ նախագահ Թրամփի և փոխնախագահ Վենսի հետ լեզվակռիվ է տեղի ունեցել, և համաձայնագրի ստորագրումը չեղարկվել է։

Bloomberg-ը գրել էր, որ ԱՄՆ վարչակազմը ցանկանում է, որ Վլադիմիր Զելենսկին հրապարակային ներողություն խնդրի հարաբերությունները վերականգնելու համար։

Ավելի ուշ Զելենսկին գրառում է կատարել՝ ասելով, որ փետրվարի 28-ի հանդիպումը «չանցավ այնպես, ինչպես պետք է լիներ», և որ ինքը պատրաստ է «աշխատել Թրամփի ուժեղ ղեկավարության ներքո», սակայն այդպես էլ ներողություն չի խնդրել։