Ֆիլիպինների նախկին նախագահը ձերբակալվել է

Ֆիլիպինների ոստիկանությունը ձերբակալել է երկրի նախկին նախագահ Ռոդրիգո Դուտերտեին, ով պաշտոնավարել է 2016 թվականի հունիսից մինչև 2022 թվականի հունիսը, հայտնում է Bloomberg-ը։

Միջազգային քրեական դատարանը (ՄՔԴ) նրան ձերբակալելու օրդեր է տվել՝ մեղադրելով մարդկության դեմ հանցագործությունների մեջ։ Իրավապաշտպան կազմակերպությունները հայտնում են, որ թմրամիջոցների ապօրինի շրջանառության դեմ պայքարի շրջանակներում Դուտերտեի կողմից տասնյակ հազարավոր ֆիլիպինցիներ մահապատժի են ենթարկվել։

Դուտերտեն ձերբակալվել է Մանիլայի օդանավակայանում և այժմ կալանքի տակ է գտնվում։

Փաստաբան Սալվադոր Պանելոն ձերբակալությունն անօրինական է անվանել՝ հիշեցնելով, որ Ֆիլիպինները ՄՔԴ-ից դուրս է եկել 2019 թվականին՝ Դուտերտեի հրահանգով։ Սակայն դատարանը պնդում է, որ իրավասու է դատելու 2011 թվականի նոյեմբերի 1-ից մինչև 2019 թվականի մարտի 16-ը ներառյալ կատարված հանցագործությունները:

Դուտերտեն ավելի վաղ հայտնել էր, որ պատրաստ է կանգնել դատարանի առաջ։