Սիրիան հրետակոծել է Լիբանանի սահմանամերձ բնակավայրերը

Սիրիական բանակը լայնածավալ հարձակում է իրականացրել լիբանանյան տարածքի վրա, ինչի հետևանքով երեխա է զոհվել, հայտնում է լիբանանյան Al Jadeed հեռուստաալիքը։

«Սիրիայի կողմից լիբանանյան սահմանամերձ բնակավայրերի հրետակոծության արդյունքում Քուսեյր քաղաքում երեխա է զոհվել»,- ասվում է հաղորդագրության մեջ։

Հեռուստաալիքի տվյալներով՝ ռմբակոծությունների ուժգնացումից հետո սահմանամերձ շրջանների բնակչությունը տարհանվում է Լիբանանի հյուսիս-արևելքում գտնվող Հերմել քաղաքի ուղղությամբ։

Լիբանանի տարածքների հրթիռակոծումն սկսվել է Սիրիայի պաշտպանության նախարարության հայտարարության հրապարակումից անմիջապես հետո, որում գերատեսչությունը շիական «Հեզբոլլահին» մեղադրում է երեք զինվորների առևանգման և սպանության մեջ։ Հեզբոլլահի մամուլի ծառայությունը կտրականապես հերքում է դա, նշում է լրատվամիջոցը։