«Ուկրաինային ռազմական օգնության դադարեցումը բացասաբար չի անդրադարձել նրանց վրա»․ Թրամփ

ԱՄՆ նախագահ Դոնալդ Թրամփը հայտարարել է, որ Ուկրաինային ռազմական օգնության դադարեցման վերաբերյալ իր որոշումը բացասական հետևանքներ չի ունեցել Ուկրաինայի զինված ուժերի համար։ Այս մասին, Fox News-ի փոխանցմամբ, Թրամփը լրագրողներին հայտնել է ճեպազրույցում։

«Ուկրաինային ռազմական օգնությունը և հետախուզական տվյալների փոխանակումը դադարեցնելու որոշումը բացասական հետևանքներ չի ունեցել Ուկրաինայի զինված ուժերի համար։ Իրականում՝ ճիշտ հակառակը։ Եվ, կարծում եմ, դա տեսանելի էր։ Դուք պետք է հասկանաք, որ եթե ես տեսնում եմ, որ ինչ-որ մեկը վատ բան է անում, միակ պատճառը, որ միջամտում եմ, մարդասիրությունն է: Այնտեղ շատ մարդիկ են մահանում»,- ասել է Թրամփը։

Միևնույն ժամանակ նա նշել է, որ «սա բարդ իրավիճակ էր», և Ուկրաինային «պետք էր ստիպել ճիշտ վարվել»։

«Կարծում եմ՝ նրանք հիմա ճիշտ են վարվում, և մենք փորձում ենք խաղաղության պայմանագիր կնքել։ Մենք ցանկանում ենք հասնել հրադադարի, ապա՝ խաղաղության համաձայնագրի»,- ասել է ԱՄՆ նախագահը։

Ավելի վաղ հաղորդվել էր, որ ԱՄՆ-ն վերսկսում է Ուկրաինային ռազմական օգննության տրամադրումը և հետախուզական տվյալների փոխանակումը։