Հութիները հարվածել են Թել Ավիվի օդանավակայանին և ԱՄՆ ռազմանավերին

Եմենի հյուսիսային մասը վերահսկող «Անսար Ալլահ» (հութիներ) ռազմաքաղաքական շարժումը հայտարարել է, որ հրթիռային հարված է հասցրել Թել Ավիվի Բեն Հուրիոն օդանավակայանին, Telegram ալիքում հայտնել է հութիների ռազմական ներկայացուցիչ Յահյա Սարիան:
«Հրթիռային ուժերն արդյունավետ ռազմական գործողություն են իրականացրել Յաֆֆայի շրջանի Բեն Հուրիոն օդանավակայանին հարվածելու համար: Գործողությունն իրականացվել է «Պաղեստին-2» հիպերձայնային բալիստիկ հրթիռի կիրառմամբ և հաջողությամբ հասել է իր նպատակին», - ասված է հայտարարության մեջ:
Սարիան հավելել է, որ Եմենի ուժերը նաև «հարձակվել են Կարմիր ծովում թշնամու ռազմանավերի, այդ թվում՝ ամերիկյան Harry Truman ավիակրի և հարակից ռազմանավերի վրա»։

Հիշեցնենք, որ Գազայի հատվածում Իսրայելի կողմից վերջին հարվածներից հետո հութիները վերսկսել են ռազմական գործողություններն Իսրայելի դեմ՝ հայտնելով իրենց աջակցությունը Գազայի պաղեստինցի բնակիչներին։