Իմամօղլուն հերքել է իրեն առաջադրված բոլոր մեղադրանքները

Կոռուպցիայի, կաշառակերության և ահաբեկչության հետ կապերի գործով ձերբակալված Ստամբուլի քաղաքապետ Էքրեմ Իմամօղլուն իր ցուցմունքներում հերքել է իրեն առաջադրված բոլոր մեղադրանքները, հաղորդում է A Haber հեռուստաալիքը։
Իմամօղլուն շաբաթ օրը ցուցմունքներ է տվել, դատավարությունը տևել է հինգ ժամ, ավելի վաղ հայտնել էր A haber հեռուստաալիքը։

«Իմամօղլուն հերքել է այն մեղադրանքները, որ Քրդստանի աշխատավորական կուսակցության հետ կապ ունեցող մարդիկ աշխատանքի են ընդունվել Ստամբուլի քաղաքապետարանում։ Նա հայտարարել է, որ ընտրական գործընթացի շրջանակներում տարբեր քաղաքական կուսակցությունների հետ իր շփումները բնական էին, և շեշտել է, որ ինքը կապեր չունի ահաբեկչական կազմակերպությունների հետ… Իմամօղլուն քննադատել է իր դեմ կիրառված խափանման միջոցը և հայտարարել, որ այդ գործընթացը վնասում է Թուրքիայի ժողովրդավարականությանը, և որ ժողովուրդն անհրաժեշտ պատասխան կտա ընտրությունների միջոցով»,- հայտնել է հեռուստաալիքը։
Չորեքշաբթի Ստամբուլի քաղաքապետի կալանավորումը զանգվածային բողոքի ալիք է բարձրացրել։

Իշխանություններն ուժեղացրել են մի շարք կենտրոնական փողոցների անվտանգությունը և մինչև կիրակի արգելել են քաղաքում ցանկացած հանրահավաք կամ ցույց:

Վերջին տվյալներով՝ Թուրքիայում ավելի քան 340 ցուցարար է ձերբակալվել։