«Ձեր պատկերացրած իրական Հայաստանը Ադրբեջանի պատկերացրած «արևմտյան Ադրբեջանն» է»․ Քրիստինե Վարդանյանը՝ Նիկոլ Փաշինյանին

«Հերիք է մեր ժողովրդին փորձեք համոզել, որ Հայաստանի և Ադրբեջանի միջև եղած միակ խնդիրը արցախյան հարցն է․ այ, արցախյան հարցը հենց փակենք, էլ որևէ խնդիր չենք ունենա»,- ԱԺ-կառավարություն հարցուպատասխանի ժամանակ դիմելով Նիկոլ Փաշինյանին՝ ասաց «Հայաստան» խմբակցության պատգամավոր Քրիստինեն Վարդանյանը։
Պատգամավորը նշեց, որ ՀՀ իշխանությունն անընդհատ զիջում է, չի խոսում արցախցիների վերադարձի մասին, իսկ Ադրբեջանը խոսում է ադրբեջանցիների՝ Հայաստանում բնակեցման մասին։

«Ժողովուրդն ամեն տարի մեծացող շարժումով գալիս է, ձեզ ասում է՝ հեռացե՛ք։ Եթե ձեզ համար որևէ թիվ կա, որ դրանից հետո է ժողովուրդ, այդ թիվն ասեք, մենք շատ արագ դա կկազմակերպենք»,- ասաց Քրիստինե Վարդանյանը։
Նիկոլ Փաշինյանի պատասխանից հետո պատգամավորն ընդգծեց․ «Մեր խնդիրն այն է, որ ձեր պատկերացրած իրական Հայաստանը Ադրբեջանի պատկերացրած արևմտյան Ադրբեջանն է։ Հայաստանում կա երկընտրանք եղածն ամեն գնով պահելու և ամեն ինչ կորցնելու միջև, դուք ամեն ինչ կորցնելու ճանապարհն եք ցույց տալիս»։