«Ադրբեջանի հետ համաձայնության հասնելու հնարավորությունը հավերժ չի լինի»․ Ամիրբեկով

Ադրբեջանական կողմը հայկական կողմին կոչ է արել արագացնել խաղաղության համաձայնագրի ստորագրման գործընթացը եւ նշել, որ այդ հնարավորությունը հավերժ չի լինելու։

Այս մասին արգենտինական Perfil թերթին տված հարցազրույցում ասել է Բուենոս Այրեսում այցով գտնվող Ադրբեջանի նախագահի հատուկ ներկայացուցիչ Էլչին Ամիրբեկովը։

«Համաձայնության գնալու Հայաստանին դրդող գործոններից մեկն այն գիտակցումն է, որ այս հնարավորությունը հավերժ չի լինի, և սխալ կլինի այն բաց թողնել»,- ասել է Ամիրբեկովը։

Նրա խոսքով՝ Բաքվի և Երևանի միջև խաղաղության համաձայնագրի նախագծի տեքստի շուրջ այս ամիս ավարտված բանակցությունները ճանապարհ են հարթում հարաբերությունների կարգավորման և դիվանագիտական ​​կապերի հաստատման համար։ Սակայն դրան հասնելու համար Հայաստանը պետք է փոփոխի իր Սահմանադրությունը, հրաժարվի տարածքային պահանջներից և դուրս բերի օտարերկրյա ուժերը սահմանամերձ տարածքներից։
Ըստ աղբյուրի՝ Ադրբեջանը ձգտում է իր դիրքորոշումը ներկայացնել միջազգային հանրությանը՝ ընդգծելով իր դերը Եվրոպայի էներգետիկ ոլորտում, հաշվի առնելով տարածաշրջանում փոփոխվող աշխարհաքաղաքական հավասարակշռությունը: