«ԱՄՆ-ն դեռ երկար կշարունակի հարվածել Եմենի հութիներին»․ Թրամփ

ԱՄՆ-ն մտադիր է շարունակել հարվածներ հասցնել Եմենի Անսար Ալլահ շարժման հութի ապստամբների հենակետերին «դեռ երկար ժամանակ»։ Այս մասին Սպիտակ տանը պատասխանելով լրագրողների հարցերին՝ հայտնել է ԱՄՆ նախագահ Դոնալդ Թրամփը։

«Այդ հարվածները շատ հաջող են եղել, դրանք գերազանցել են մեր բոլոր ակնկալիքները: Մենք նրանց հարվածել ենք շատ ուժեղ, շատ հաջող: Եվ մենք դեռ երկար ժամանակ կշարունակենք դա»,- ասել է ԱՄՆ նախագահը:

Հիշեցնենք, որ մարտի 15-ին ԱՄՆ զինված ուժերը Թրամփի հրամանով սկսեցին զանգվածային հարվածներ հասցնել Եմենի տարածքի մոտ մեկ երրորդը վերահսկող հութիների օբյեկտներին։ ԱՄՆ-ն հայտնել էր, որ գործողությունն ուղղված է ամերիկյան շահերի պաշտպանությանը և անվտանգ նավարկության ապահովմանը։

Ի պատասխան՝ Անսար Ալլահ շարժումը մի շարք հարձակումներ է իրականացրել Կարմիր ծովի հյուսիսում գտնվող ամերիկյան USS Harry Truman ավիակրի վրա՝ օգտագործելով հրթիռներ և անօդաչու սարքեր։ Հարվածների հետևանքով նավի վնասների մասին տեղեկություններ չկան։